भोलिदेखि बालबालिकालाई भिटामिन ‘ए’ तथा जुकाको औषधि खुवाइने
काठमाडौं, ५ वैशाख । सरकारले भोलिदेखि बालबालिकालाई भिटामिन ‘ए’ र जुकाको औषधि खुवाउने भएको छ ।
बालबालिका लक्षित राष्ट्रिय कार्यक्रम अन्तर्गत सरकारले भोलि र पर्सी गरी ६ महिनादेखि ५ वर्षसम्मका बालबालिकाहरुलाई भिटामिन ‘ए’ क्यापसुल खुवाउने छ ।
यसैगरी एक वर्षदेखि ५ वर्षसम्मका बालबालिकालाई भिटामिन ‘ए’ र जुका दुबैको औषधि खुवाइने छ ।
६ गते खान छुटेकालाई ७ गते खुवाउन सकिने स्वास्थ्य तथा जनसंख्या मन्त्रालयले जनाएको छ ।
आफूलाई पायक पर्ने खोप केन्द्रमा गएर बालबालिकाहरुलाई भिटामिन ‘ए’ र जुकाको औषधि खुवाउन मन्त्रालयले सबै अभिभावकहरुलाई आग्रह गरेको छ ।
सरकारले हरेक वर्ष बालबालिकाहरुलाई राष्ट्रिय भिटामिन ‘ए’ तथा जुकाको औषधि खुवाउने गर्दै आएको छ ।
अघिल्लो पटक खाएकाहरुलाई अहिले पनि खुवाउनु पर्ने परिवार कल्याण महाशाखा अन्तर्गतको खोप शाखाका प्रमुख डा. झलक शर्मा गौतमले बताए ।
उनले यस वर्ष कोरोना सङ्क्रमणको जोखिम रहेकाले औषधि खुवाउने ठाउँसम्म जाँदा स्वास्थ्य सुरक्षाका मापदण्ड पालना गर्न र गराउन पनि सबैलाई आग्रह गरे ।
वितरण केन्द्रमा भिडभाड नगर्न, एक व्यक्ति र अरु व्यक्तिबीच कम्तिमा दुई मिटरको भौतिक दुरी कायम गर्न, अनिवार्य रुपमा मास्क प्रयोग गर्न, साबुन पानीले पटक पटक हात धुन वा सेनिटाइजर प्रयोग गर्न पनि मन्त्रालयले आग्रह गरेको छ ।
