भारतबाट आउनेको परीक्षण गर्दा थप २५ जनामा कोरोना पोजेटिभ
काठमाडौं, २७ चैत । भारतबाट नेपाल छिर्ने नाकामा राखिएको हेल्थ डेस्कमा कोरोना परीक्षण गर्दा थप २५ जनामा कोरोना पोजेटिभ देखिएको छ ।
स्वास्थ्य तथा जनसंख्या मन्त्रालयका अनुसार गड्डा चौकी हेल्थ डेस्क कञ्चनपुरमा १६२ जनाको एन्टिजेन परीक्षण गर्दा २ जनामा पोजेटिभ भएको पाइएको छ । यस्तै कञ्चनपुरकै त्रिनगर हेल्थ डेस्कमा ३२९ जनाको परीक्षण गर्दा २३ जनाको पोजेटिभ देखिएको हो ।
यो संगै पछिल्लो चौविस घण्टामा पीसीआर र एन्टीजेन परीक्षण गर्दा पोजेटिभ हुनेको संख्या ३५७ जना पुगेको छ । यसअघि मन्त्रालयले पीसीआरबाट परीक्षण गर्दा पछिल्लो चौविस घण्टामा ३३२ जनामा कोभिड( १९ पोजेटिभ देखिएको थियो ।
स्वास्थ्य सेवा विभाग इपिडिमियोलोजी तथा रोग नियन्त्रण महाशाखाका निर्देशक डा कृष्णप्रसाद पौडेलले सिमा नाकामा गत ६ चैत देखि हेल्थ डेस्कमा एन्टीजेन परीक्षण गर्ने व्यवस्था मिलाइएको बताए ।
उनले त्यस यता अहिलेसम्म विभिन्न नाकामा गरी कुल २७२ जनामा कोभिड १९ पोजेटिभ केश आएको बताए । यस अवधीमा ६ हजार ९६४ जनाको टेष्ट भएको थियो ।
