बहराइनले नेपाल भित्र्याएको कोरोना विरुद्धको खोपको विषयमा विभागले थाल्यो छानबिन
काठमाडौं, ४ चैत । औषधि व्यवस्था विभागले बहराइनबाट नेपाल भित्र्याएको कोरोना विरुद्धको खोपको विषयमा छानबिन सुरु गरेको छ ।
बहराइन सरकारले सोमवार २ हजार डोज कोरोना विरुद्धको खोप नेपाल ल्याएपछि स्वास्थ्य तथा जनसंख्या मन्त्रालयले त्यस विषयमा छानबिन गर्नका लागि निर्देशन दिएको हो ।
मन्त्रालयको निर्देशन पछि विभागले छानबिन सुरु गरेको विभागका सूचना अधिकारी एवं प्रवक्ता सन्तोष केसीले हाम्रो डाक्टर न्यूजलाई बताए ।
उनले बहराइनबाट नेपाल भित्रिएको खोपको विषयमा हिजै सुनेपनि मन्त्रालयले मंगलबार मात्रै त्यस विषयमा छानबिन गर्नका लागि निर्देशन दिएपछि छानबिन सुरु गरिएको बताए ।
मन्त्रालयले विभागसँग छलफल गरिरहेको र बहराइनबाट नेपाल भित्रिएको खोपको विषय के हो ? खोप के गर्ने ? लगायतका विषयमा सम्बन्धीत निकायसँग छलफल भइरहेको पनि केसीले बताए ।
उनले भने, ‘अहिलेको विषम् परिस्थितिमा खोप जस्तो कुरालाई कसैले पनि वेवास्ता गर्नु हुँदैन । फेरि खोप लगायतका विषय औषधि व्यवस्था विभागसँग सरोकार राख्ने भएकाले स्वीकृति बिना नेपाल भित्र्याउने र प्रयोग गर्न पाइँदैन । त्यसकारण यस विषयमा थप छानबिन र छलफल भइरहेको छ ।’
यस विषयमा छानबिनको क्रममा केही निस्कर्ष निस्केको खण्डमा हामी सूचना सार्वजनिक गर्ने केसीको भनाइ छ ।
बहराइनका राजकुमार मोहम्मद हमाद मोहम्मद अल खालिफा सहितको १५ जनाको टोलीले सोमबार नेपाल आउँदा उक्त खोप ल्याएका थिए ।
