फागुन २३ देखि सुरु हुने खोप अभियान २० दिन चल्ने
काठमाडौं, २० फागुन । स्वास्थ्य तथा जनसङ्ख्या मन्त्रालयले यही फागुन २३ गतेदेखि सञ्चालन गर्ने कोभिड–१९ विरुद्ध खोपको दोस्रो चरणको अभियान २० दिन चल्ने भएको छ।
मन्त्रालयका प्रवक्ता डा. जागेश्वर गौतमले पहिलो १० दिनमा ६५ वर्षमाथिका र त्यसपछिका १० दिन ५५ वर्षदेखि ६४ वर्ष उमेर समूहलाई खोप दिइने जानकारी दिए। उनले आफूलाई पायक पर्ने स्थानबाट खोप लिनसमेत आग्रह गरे।
यसैगरी बुधबार सभामुख अग्निप्रसाद सापकोटा, पूर्वप्रधानमन्त्री तथा नेपाल कम्युनिस्ट पार्टी ९नेकपा० का प्रचण्ड माधव नेपाल समूहका अध्यक्षद्वय पुष्पकमल दाहाल ‘प्रचण्ड’ र माधवकुमार नेपाल, उपप्रधानमन्त्री ईश्वर पोखरेल, स्वास्थ्यमन्त्री हृदयेश त्रिपाठीलगायतले पनि कोभिड १९ विरुद्धको खोप ‘कोभिशिल्ड’ लगाएका छन्।
सरकारले भारत सरकारको अनुदानमा प्राप्त १० लाख मात्रा ‘कोभिसिल्ड’ पहिलो चरणको अभियानअन्तर्गत गत माघ १४ देखि सञ्चालन गरेर सम्पन्न भएको थियो। सो अवसरमा खोप नेपालको कुल जनसङ्ख्याको १/४ प्रतिशतलाई खोप प्रदान गरिएको थियो। सोमा अग्रपङ्क्तिमा काम गर्ने स्वास्थ्यकर्मी, सुरक्षाकर्मी, पत्रकार र सरकारी कर्मचारीलगायत चार लाख २९ हजार ७०५ जनालाई खोप लगाएका थिए। दोस्रो चरणको खोप पनि ‘कोभिसिल्ड’ नै प्रदान गरिनेछ। रासस
