नेपालमा कोरोना संक्रमणमुक्त हुनेको तुलनामा संक्रमित हुने संख्या फेरि बढ्दै
१ सय १२ नयाँ संक्रमित थपिदा ८४ जना स्वस्थ
काठमाडौं, १३ फागुन । नेपालमा पछिल्लो समय कोरोना संक्रमणमुक्त हुनेको संख्या घट्दै गएको छ ।
स्वास्थ्य तथा जनसंख्या मन्त्रालयका अनुसार गत २४ घन्टामा थप ८४ जना कोरोना संक्रमणमुक्त भएका छन् । योसँगै नेपालमा कोरोना संक्रमणमुक्त हुनेको संख्या २ लाख ७० हजार २ सय २३ पुगेको छ ।
यस्तै गत २४ घन्टामा थप १ सय १२ जनामा कोरोना भाइरसको संक्रमण पुष्टि भएको छ । मन्त्रालयका अनुसार गत २४ घन्टामा ३ हजार ४ सय ११ पिसिआर परीक्षण गर्दा ५२ जना महिला र ६० जना पुरुषमा कोरोना संक्रमण देखिएको हो ।
पछिल्लो समय नेपालमा कोरोना संक्रमणमुक्त हुनेको तुलनामा संक्रमित हुने दर फेरि बढ्न थालेको छ ।
मन्त्रालयको अद्यावधिक विवरण अनुसार पछिल्लो समय नेपालमा संक्रमणमुक्त हुने भन्दा संक्रमित हुनेको संख्या बढेको देखिन्छ ।
९ दिनअघि नेपालमा १ सय २५ जना नयाँ संक्रमित थपिँदा ९१ जना स्वस्थ भएका थिए । यस्तै गत २४ घन्टामा १ सय १२ जना नयाँ संक्रमित थपिँदा जम्मा ८४ जना कोरोना संक्रमणमुक्त भएका छन् ।
हाल नेपालभर सक्रिय संक्रमितको संख्या ८ सय ८२ छ ।
