१ लाख ५८ हजारभन्दा बढीले लगाए खोप, पहिलो चरणको खोप अभियान माघ २४ सम्म मात्रै चल्ने
खोप लिन छुटेकालाई मन्त्रालयको यस्तो निर्देशन
काठमाडौं, २२ माघ । नेपालमा कोरोना विरुद्धको खोप लगाउनेको संख्या १ लाख ५० हजार नाघेको छ ।
स्वास्थ्य तथा जनसंख्या मन्त्रालयका अनुसार खोप अभियानको नवौं दिनसम्म ७७ जिल्लाका २ सय १ वटा खोप केन्द्रबाट १ लाख ५८ हजार ४ सय ८७ जनाले खोप लगाएका छन् ।
भारत सरकारले अनुदान स्वरुप उपलब्ध गराएको कोरोना विरुद्धको कोभिशिल्ड नामक खोप नेपाल सरकारले अभियान चलाएर लगाउन सुरु गरेको हो ।
मन्त्रालयका अनुसार बिहीवार साँझ ४ बजेसम्म प्रदेश १ मा २१ हजार ७ स य ५४, प्रदेश २ मा २१ हजार १ सय ८५, बागमती प्रदेशमा ५५ हजार ५ सय ४, गण्डकी प्रदेशमा १७ हजार २ सय ६७, लुम्बिनी प्रदेशमा २३ हजार ७ स य ९८, कर्णाली प्रदेशमा ८ हजार ७२ र सुदूरपश्चिम प्रदेशमा १० हजार ९ सय ७ जनाले कोरोना विरुद्धको खोप लगाइसकेका छन् ।
सरकारले पहिलो चरणमा कोरोना विरुद्धको लडाईंमा अग्रपंक्तिमा खटिएका स्वास्थ्यकर्मी, सुरक्षाकर्मी, सफाइकर्मी लगायतलाई खोप लगाउँदैछ ।
मन्त्रालयका प्रवक्ता डा. जागेश्वर गौतमले पहिलो चरणको खोप अभियान माघ २४ गतेसम्म चल्ने बताएका छन् ।
उनले सूचना प्रणालीमा दर्ता नभएका कारण खोप सेवा लिनबाट बञ्चित हुन नदिन नेपाल मेडिकल काउन्सिल, नेपाल नर्सिङ काउन्सिल, नेपाल स्वास्थ्य व्यवसायी परिषद, नेपाल आयुर्वेद मेडिकल काउन्सिल र नेपाल फार्मेसी काउन्सिलको दर्ता प्रमाण पत्र र फोटोसहितको परिचय पत्र लिएर खोप केन्द्रमा गई खोप लगाउन सक्ने पनि स्पष्ट पारेका छन् ।
