चितवनमा थप २ जनासहित मंगलबार एकैदिन ३ जना काेराेना संक्रमितकाे मृत्यु
चितवन, २१ असाेज । चितवनमा थप दुई जना काेराेना भाइरस (काेभिड–१९) संक्रमित पुरूषकाे मृत्यु भएको छ ।
भरतपुर १० स्थित चितवन मेडिकल कलेज शिक्षण अस्पतालमा उपचाररत भरतपुर महानगरपालिका–१० का ६१ वर्षीय पुरुषको मंगलबार साँझ ६ः३० बजेको समयमा मृत्यु भएको अस्पतालका निर्देशक प्रा. डा. दयाराम लम्सालले जानकारी दिए ।
उनका अनुसार ती पुरूष साेमबार अस्पतालमा भर्ना भएका थिए । उनमा भर्ना भएकाे भाेलिपल्ट मंगलबार काेराेना संक्रमण पुष्टि भएकाे थियाे । ती पुरूषलाई अस्पतालकाे काेभिड आइसीयूमा राखेर उपचार गरिएकाे थियाे ।
संक्रमण पुष्टि भएकै दिन ती पुरूषकाे मृत्यु भएकाे हाे । मृतक ती पुरूष मधुमेह र उच्च रक्तचापको बिरामी समेत थिए ।
यसैबिच भरतपुर १० स्थित कलेज अफ मेडिकल साइन्सेस शिक्षण अस्पताल (पुरानो मेडिकल कलेज) उपचाररत थप एकजना संक्रमित पुरूषकाे मृत्यु भएकाे छ ।
श्वासप्रश्वासको समस्या देखिएका राप्ती नगरपालिका–९ का ८१ वर्षीय वृद्धको मंगलबार साँझ ६ः३० मृत्यु भएको अस्पतालले जनाएकाे छ ।
स्वास्थ्यमा समस्या देखिएपछि ती पुरूषलाई साँझ ६ बजे अस्पताल पुर्याइएकाे थियाे । अस्पताल पुगेकाे केहीबेरमै उनकाे मृत्यु भएकाे हाे ।
उनको मृत्यु पश्चात् साँझ ७ बजे बल्ल कोरोना पुष्टि भएकाे रिपोर्ट आएको थियाे । काेराेना संक्रमणकाे आशंकामा असोज १८ गते पीसीआरका लागि स्वाब दिएर ती वृद्ध घरमै बस्दै आएका थिए ।
यसअघि मंगलवार बिहान ३ः४५ बजे नवलपुरकाे कावासोती नगरपालिका ५ की ७७ वर्षीया काेराेना संक्रमित वृद्धाकाे चितवन मेडिकल कलेजमा उपचारकाे क्रममा मृत्यु भएकाे थियाे ।
यसरी मंगलबार दुई पुरूष र एक महिलासहित चितवनमा तीनजना काेराेना संक्रमितकाे मृत्यु भएकाे छ । जसमध्ये महिला भने जिल्ला बाहिरकी हुन् ।
स्वास्थ्यकर्मीसमेत रहेका पाठक हाम्रो डक्टर न्यूजका चितवन ब्यूरो प्रमुख हुन् ।