एमबीबीएस र बीडीएस लाईसेन्स परीक्षाको नतिजा प्रकाशित
काठमाडौ, २२ भदौ । नेपाल मेडिकल काउन्सिलले भदौ २० गते (शनिवार) लिएको एमबीबीएस र बीडीएस लाइसेन्स परीक्षाको नतिजा प्रकाशित गरेको छ ।
काउन्सिलले आइतबार राती नतिजा सार्वजनिक गरेको हो । काउन्सिलले एमबीबीएस र बीडीएस उत्तिर्ण गरेका चिकित्सकहरुले काम गर्न पाउने अनुमतिको लागि लिने यो परीक्षा कोरोनाका कारण ५ महिनापछि लिएको थियो ।
काउन्सिलले पहिलो पटक उपत्यका बाहिरका ९ र उपत्यकाका ८ ठाउँबाट परीक्षा लिएको हो । उपत्यका बाहिरबाट उत्तर पुस्तिका ल्याएर परीक्षण गर्नुपरेकाले नतिजा प्रकाशनमा ढिला भएको काउन्सिलका रजिष्टार डा. कृष्णप्रसाद अधिकारीले जानकारी दिए ।
चिकित्सादर्ता प्रमाण परिक्षामा मेडिकल तर्फ ७ सय ८५ र डेन्टल तर्फ २ सय २६ गरि जम्मा एक हजार ४७ जना सहभागि भएका थिए । जसमा मेडिकल तर्फ तीन सय ५८ जना र डेन्टल तर्फ एक सय ५१ जना उत्तिण भएकाछन् ।
यस पटक काउन्सिलले धरान, विराटनगर, लहान, जनकपुर, वीरगन्ज, पोखरा, बुटवल र नेपालगन्जबाट लाईसेन्स परीक्षा लिएको थियो ।
