चितवन मेडिकल कलेजमा उपचाररत थप एक जना कोरोना संक्रमितको मृत्यु
चितवन, १८ भदौ । भरतपुर १० स्थित चितवन मेडिकल कलेज शिक्षण अस्पतालमा उपचाररत थप एक जना कोरोना संक्रमित महिलाको मृत्यु भएको छ ।
चितवन जिल्लाको भरतपुर महानगरपालिका–११ की ४० वर्षीया महिलाको राति १२:२३ बजे मृत्यु भएको अस्पतालका निर्देशक डा. दयाराम लम्सालले हाम्रो डक्टर न्यूजलाई बताए ।
ती महिलालाई भेन्टिलेटरको सहायताले सघन उपचार कक्ष (आइसीयू) मा राखेर उपचार गरिएको थियो ।
झाडापखाला भएर भदौं ५ गते अस्पताल भर्ना भएका उनको भदौ १० गते कोरोना संक्रमण पुष्टि भएको थियो । निर्देशक डा. लम्सालका अनुसार ती महिलामा झाडापखाला, शरीरमा सोडियमको मात्रा कम हुनुका साथै शरीरमा पानीको मात्रा समेत एकदम कम देखिएको थियो ।
योसँगै अहिलेसम्म चितवनमा १८ जना संक्रमितको मृत्यु भईसकेको छ । जस मध्ये जिल्ला भित्रका कोरोना संक्रमितको मृत्यु हुनेको संख्या १० पुग्यो । यहाँ उपचारको क्रममा विभिन्न अस्पतालमा गरी जिल्ला बाहिरका आठ जनाको मृत्यु भईसकेको छ ।
स्वास्थ्यकर्मीसमेत रहेका पाठक हाम्रो डक्टर न्यूजका चितवन ब्यूरो प्रमुख हुन् ।