दोहा हुँदै नेपाल फर्किएकी युवती राप्ती अस्पतालको क्वारेन्टाइनमा
दाङ, १२ चैत । दाङमा एक जना युवतीलाई क्वारेन्टाइनमा राखिएको छ ।
बुधवार दाङको बबई गाउँपालिका वडा नं. २ का एक युवतीलाई क्वारेन्टाईनमा राखिएको हो ।
गत चैत ५ गते उनी दाङ पुगेकी थिइन् । गत चैत ४ गते फ्रान्सबाट कतार हुँदै नेपाल आएकी ती युवतीलाई बुधवार तुलसीपुर स्थित राप्ती प्रादेशिक अस्पतालको क्वारेन्टाईनमा राखिएको जनाइएको छ ।
गत चैत ४ गते फ्रान्सबाट कतारको दोहा हुँदै नेपाल आएकी एक युवतिमा कोरोना पोजेटिभ देखिएपछि उनी सवार विमानका यात्रुलाई कोरोना जाँचका लागि सरकारले क्वारेन्टाइनमा बस्न र राख्न आदेश दिएसँगै उनलाई पनि क्वारेन्टाइनमा राखिएको हो ।
उनमा कोरोना भए नभएको विषयमा स्वाब परीक्षणका लागि राष्ट्रिय प्रयोगशालामा नमूना पठाउने तयारी भएको छ । अहिलेसम्म भने उनमा कोरोना लक्षण नदेखिएको अस्पतालले जनाएको छ ।
दाङका प्रमुख जिल्ला अधिकारी गोविन्द रिजालका अनुसार उनी कतार एयरवेजबाट गत चैत ४ गते नै नेपाल आएकी थिईन । उनीसँगै आएकी बबईका अर्का एक जना युवती भने अझै सम्पर्कमा आउन सकेकी छैनन । उनको पनि खोजी भइरहेको रिजालले बताए ।
