विरगञ्जवासी रुगंटामा कोरोना भएको हल्लामात्रै
विरगञ्ज, १० चैत । विरगञ्जका उद्योगी शिवकुमार रुगंटालाई कोरोना भाइरसको संक्रमण नभएको जनाइएको छ ।
आइतवार विभिन्न सञ्चार माध्यममा रुगंटालाई कोरोना भएको पुष्टि भएको भन्दै समाचार आएपछि विरगञ्जसहित आसपासका क्षेत्र त्रसित बनेको थियो ।
भारतीय सञ्चारमाध्यमको दावीमा सत्यता नभएको भन्दै नेपाली उद्योगी शिवकुमार रुगंटालाई कोरोना भाइरसको संक्रमण नभएको भतिजा आकाश रुगंटाले विभिन्न समाचारमाध्यमबाट पुष्टी गरेका छन् ।
उनले बिहारको राजधानी पटनामा रहेको इन्डियन काउन्सिल अफ मेडिकल रिसर्च (पिएमसिएच) ले दुई दिनअघि सार्वजनिक गरेको रिपोर्टको आधारमा शिवकुमार रुगंटामा कोरोनाको कुनै संक्रमण नभएको बताएका हुन् ।
अस्पतालको रिपोर्टमा उनको उमेर ५२ वर्ष बताइए पनि उनको वास्तविक उमेर ६७ वर्ष र उनी वीरगञ्ज आदर्शनगर निवासी हुन् ।
उनको रगतमा कोरोना भाइरसको संक्रमण सकारात्मक भएको समाचार फैलिएसँगै पर्साका प्रमुख जिल्ला अधिकारी विष्णुकुमार कार्कीले परिवारका १८ सदस्यमध्ये १३ जनालाई घरभित्रै ‘क्वारेन्टाइन’ मा राखिएको बताएका थिए । यस्तै, अन्य ५ जनालाई पटनामा डाक्टरको निगरानीमा राखिएको बताइएको थियो ।
रुगंटाको केही समयअघि दुवै मृगौला काम नलाग्ने भएपछि श्रीलंकामा प्रत्यारोपण भएको बताइएको छ ।
गत साता आदर्शनगरस्थित आफ्नो फ्याक्ट्रीमा बसेको बेला एक्कासी ज्वरो आएपछि उनले आफ्नो नीजि चिकित्सकलाई चेकजाँच गराएको र चिकित्सककै सल्लाह मुताविक थप परीक्षणका लागि पटना पुगेका थिए ।
