कोरोना भाइरसको चेकजाँचका लागि सीमावर्ती क्षेत्रमा हेल्थ डेस्क
जनकपुरधाम, २३ माघ। जिल्ला प्रशासन कार्यालय धनुषाले कोरोना भाइरसको चेकजाँचको लागि सीमावर्ती क्षेत्रमा हेल्थ डेस्क सञ्चालन गर्ने निर्णय गरेको छ ।
धनुषाको भारतीय नाकासँग ओहोर दोहोर हुने प्रमुख नाकाहरुमा कोरोनाको निगरानी एवं चेकजाँचको लागि हेल्थ डेक्स स्थापना गर्ने निर्णय गरिएको हो ।
धनुषाका प्रमुख जिल्ला अधिकारी प्रदीपराज कणेलले धनुषाको जटही नाकामा जनकपुरधाम उपमहानगरपालिका,प्रादेशिक अस्पताल जनकपुर तथा सशस्त्र प्रहरीको सहयोगमा हेल्थ डेस्क सञ्चालन गर्ने निर्णय गरिएको बताए । उनले भने,‘ जटही नाकाबाट ओहोर दोहोर गर्ने सर्वसाधारणहरुलाई उक्त डेस्कमा चेकजाँच गरिने छ ।’ धनुषाको सबै विद्यालयहरुमा कोरोना भाईसर सम्बन्धी जनचेतनामूलक कार्यक्रमहरु समेत गरिने उनले बताए । बालबालिकाहरुलाई यसबाट बच्नको लागि प्रशिक्षण समेत दिइने निर्णय गरिएको हो,उनले भने । महोत्तरीको १३ स्थानमा हेल्थ डेक्स राखिएको छ ।
चिनमा कुकको काम गर्दै आएका भारत विहार राज्यको सितामढी जिल्ला चरौत निवासी एक युवकमा कोरोना भारइसको लक्षण देखिएकाले उनलाई सदर अस्पतालमा भर्ना गरिएको छ ।
जनकपुरधाममा पनि चीनमा अध्ययनरत केही बिद्यार्थीहरु भागेर आएकाले प्रहरीले त्यस्ता विद्यार्थीहरुलाई खोजेर उनको स्वास्थ्य अवस्थाबारे बुझने प्रयास गरिरहेको छ ।
