सिरिन्ज आक्रमणकारी सन्तोषको बयानः ‘सिरिञ्ज नभएर ढलानको किलाले घोचेको हुँ’
काठमाडौं १३ असार । काठमाडौं उपत्यकामा युवतीमाथि श्रङ्खलाबद्ध रुपमा सिरिञ्ज आक्रमण गर्ने एक युवालाई प्रहरीले गए राति साढे १२ बजे पक्राउ गरेको छ ।
महानगरीय प्रहरी परिसर काठमाडौं र अपराध महाशाखाबाट परिचालन भएको विशेष टोलीले ३० वर्षीय सन्तोष कार्कीलाई महाराजगञ्जको भाटभटेनी नजिकैबाट पक्राउ गरेको हो ।
अभियुक्त कार्कीले आफूले सिरिञ्ज नभएर ढलानको किला रोपेको बयान दिएका छन् । उनले रोग सार्ने नियतले आक्रमण नगरेको पनि बताएका छन् ।
कार्कीले रमाइलोका लागि युवतीलाई मात्रै ढलानको किलाले रोपेको बयान दिएको महानगरीय प्रहरी परिसर काठमाडौंका प्रवक्ता होबिन्द्र बोगटीले जानकारी दिए ।
उनकाअनुसार कार्कीलाई सार्वजनिक गर्न दिउँसो ११ बजे पत्रकार सम्मेलन गर्ने तयारी गरिएको छ ।
हाल उनलाई महानगरीय प्रहरी परिसर काठमाडौंको हिरासतमा राखिएको छ।
केही दिन अघिदेखि महिलामाथि श्रृखलावद्ध शंकास्पद सिरिञ्ज आक्रमण भएपछि आतंक मच्चियो ।
रोग सार्ने नियतले आक्रमण गरेको हुनसक्ने आशंकामा पीडित महिलाहरुलाई एचआईभीविरुद्धको एआरटी औषधी चलाइएको छ भने हेपाटइटिसविरुद्ध भ्याक्सिन समेत दिइएको छ ।
