अनुहारलाई सुन्दर देखाउन आँखाको ठूलो भूमिका हुन्छ । आँखाको बनावटले सौन्दर्यमा धेरै प्रभाव पारेको हुन्छ । त्यसैले सबैको ध्यान राम्रो देखिन कसरी आँखालाई सुन्दर बनाउने भन्ने हुन्छ ।

तर कहिले काहीँ त्यही आँखाले सबैलाई धोका दिने गर्छ डार्क सर्कल (आँखामुनिको कालो दाग) भएर । डार्क सर्कल भएमा मानिसलाई थकित तथा निरास बनाउने भएकाले सुन्दरतामा ठेस पुर्याउने मात्र होइन आत्मविश्वासमा पनि असर गर्छ । यसले अनुहारको आकृतिमा समेत नकारात्मक असर पुर्याउँछ । यसबाट अहिलेका युवापुस्तामा तनावको विषय बनेको छ । 

पेरिर्ओवाइटल हाइपर पिग्मिटेसनलाई डार्क सर्कल भनिन्छ । डार्क सर्कल भएमा आँखामुनिको छालाको रङ शरीरको अन्य भागको भन्दा गाढा तथा कालो हुन्छ । डार्क सर्कल मुख्यतया ३ कारणले हुने गर्छ । आँखा कालो भएर, आँखा भित्र धसिएर छायाँ पर्ने हुँदा र रगतका नशाको कारण निलो भएर हुने हुन्छ । 

डार्क सर्कल हुने मुख्य कारण नै वंशाणुगत हो । यसबाहेक तनाव, अनिन्द्रा, राति अबेरसम्म नसुत्ने, एलर्जी लामो समयसम्म औषधिको सेवन, टाइफाइन, जण्डिस, प्रदुषण, गलत खानपान, कम्प्युटरमा लामो समयसम्म चलाउने गर्नाले पनि डार्क सर्कले देखिने हुन्छ । यसैगरी कुनै पनि शल्यक्रिया गरेपछि कमजोरी हुने हुँदा यस्तो समसया देखिन्छ । साथै घाममा धेरै हिड्नाले, सुत्केरीको अवस्थामा पनि देखिने गर्छ । 

डार्क सर्कल कुनै गम्भीर समस्या होइन, तरपनि यसले धेरै व्यक्तिलाई थकित, तवान तथा निरास बनाउँछ । डार्क सर्कललाई समयमै ख्याल नगर्दा सौन्दर्यमा ठुलो समस्या ल्याउने हुन्छ । डार्क सर्कल प्रायजसो हर्मोन परिवर्तन भएपछि १२/१३ वर्षको उमेरदेखि ४०/५० वर्षको उमेरसम्म देखिने हुन्छ । तर, कसैलाई यस्तो समस्या जीवन भर पनि रहन सक्छ ।
औषधिको प्रयोग, केमिकल पिमिलिङ गर्ने र लेजर गरि यसको ३ तरिकाबाट उपचार गर्न सकिन्छ ।  

यसबाट बच्नका लागि समयमै सुत्ने, अनिन्द्रा नरहने, घामबाट बच्ने, पानी धेरै पिउने, फलफूलको सेवन गर्ने, घाममा हिँड्दा सन ग्लासको प्रयोग गर्ने जस्ता सावधानी अपनाउन सकिन्छ । साथै डार्क सर्कल जान्छ भनेर अनावश्यक क्रिमहरुको प्रयोग गर्नुहुँदैन । जसका कारण डार्क सर्कल अझ बढेर जान सक्छ । सामन्यतया काँक्रो काटेर माथिको भाग आँखामा राख्दा केही हदसम्म यसलाई कम गर्न सकिन्छ । 

डा. खतिवडासँग बासुदेव न्यौपानेले गरेको कुराकानीमा आधारित 

Hamro Doctor